تكوين الوش بيرسم ضل
النور فعنيكى بيرسم شكل حياه
عناقيد من روحى وروحك تغزل روح
مغزول ياحمام الحلم بلون
الاسمر لونك متبصيش للابييض
توهى فى ريحتك
لمى ضفاير قلبك م الاحلام
متحوليش تنسينى بموت م الخوف
الوحده فراق والقلب مايعرفش يميز
طعم الاغراب
ضمينى فى صوره جميله ونيل
وقمر
وعيون سهرانه بترسم ضحكه على العمدان
وولاد نعسانه على الاسفلت بتنزف
ليل
ضمينى ياضحكه ليل حيران
بيسافر غصبن عنه لنور الفجر
ارمينى فى ارضك اصبح
شمعه
بلاش الشمس تطول طراطيفى لدوب
انا عاشقك…… لكن سرك فين
يندهلى حنينك
يقسمنى جنونك بينى وبين
تخدعنى التوهه فى لونك
أسمر خمرى
عمرى بيندهلك رديه
متغرب غصبن عنى فى ليلك
كنت غريب
ومليش من ليلك غير شباك
ومليش من كونك
غير حته من السما بتطل
الفاضل عندى من امبارح
ما فاضلشى كتير
غير سن القلم الكوبيه
وورقه وحيده من الكراس
وحروف غرقانه فى دمع
حزين
وساعات من قلقى عليكى
حابسها فى دمى لتهرب
م الشرايين
والخوف بيعشش جوا نهارى
الجى
بخاف من نور الفجر
وزحمه قلبك
والميادين
وعنين الناس وكلام الكل
وعقد الفل فى ايدها السمرا
بلونك قال
متمد ايديك للابيض خد
مديت الايد وانا موتى حلال
فى نهارك لو مايجيش
الليل
