بلياتشو: يناير 2012

الثلاثاء، 10 يناير 2012

قاللك ثوره قالو ازاى

حكم العسكر رايح جاى

قاللك ثوره وانا اللى حاميها

طب مين بقى يصبح حراميها

قاللك ثوره وركز صور

الدبابه هنا بتتصور

جنب البنت ام فيونكات

قلنا دى ثوره وركز صور

العسكرى ضرب الستات

قاللك ثوره واحنا العسكر

حامين سينا قبل ماتكبر

قلت كبرت وشفت حدودى

والعسكرى بيموت متحسر

دمه بيبرد جنب حدودى

يوم ورا يوم الدم بيكتر

والعسكرى مأمور م العسكر

احمى سفاره وجنب وزاره

اما اخواتك اوعى تفكر

احنا العسكر ملح الارض

نحمى البيت ونصون العرض

كنت هاصدق بس تصور

دم الشهدا بيملى الارض

والعسكرى جنب الحرميه ؟

!والبلطجى ......بيصلى الفرض

دم الشهدا بيصرخ فيا

الدبابه بتدهس روحى

صوت الثوره فى قلبى بيكبر

دم الشهدا بيشفى جروحى

ارفض لحظه انى افكر

واسلم للعسكر روحى

ياعسكرى يا ابو كاب وبياده

يالى بتحلف ع السجاده

شفت الكدب فى ننى عنيك

دم الشهدا مابين اسنانك

والثوره بتخنقها ايديك

ام الشهدا تقوللك احذر

ثوره ابنى بتكبر اكتر

والثوره اللى فاكرها بتغرق

بكره تغرق كل العسكر

بلياتشو